المقادير:
نص فرخة متقطعة 4 قطع
3 بصلات مفرومين ناعم
كوب ونصف ارز
كوب ونصف لبن
معلقة سمنة
ملح - فلفل -كمون - شطة




الطريقة:
اول حاجة هنجيب حلة نحط فيها شوية زيت ونحط البصل ونقلبه لغاية ما يدبل بس مش ياخد لون
وبعد ما البصل يدبل هناخد الفراخ نحطها عليه ونحط عليها التوابل كلها (الملح والفلفل والكمون ورشة الشطة)
وهنقلب الفراخ مع البصل والبهارات كويس جدااا
وهنغطي الحلة ونسيب الفراخ تنزل ميتها
ونفضل مغطيين الحلة وموطيين النار بس كل شوية نبص على الفراخ ونديها تقليبة لغاية ما المية تنشف ويظهر عندنا الزيت في الحلة
بعد كده هنشيل الفراخ من الحلة ونسيب الزيت والبصل في الحلة
وبعدين هنضيف الرز المغسول فوق البصل ونقلبه كويس جداا
نيجي بقى لتحضير البرام
هنجيب البرام وندهنه بشوية سمنة
وبعدين هناخد شوية رز من الرز بالبصل اللي في الحلة وبعد كده هنرص الفراخ فوقيه ونرجع نحط طبقة رز تاني
وبعد كده في الاخر هنضيف اللبن الكوباية ونص وهنحط زيهم ميه او شوربة لو عندك وندوب فيها الملح قبل ما نحطها على الرز
ندخلة الفرن لغاية ما يستوى ويقدم بالهنا والشفا