المطابخ الالوميتال 2013 , اسعار المطابخ الالوميتال بالانواع 2014
هقولكم على كل حاجة والى عاوزة تعرف أى حاجة هقولها
أولا كده : قطاعات الألوميتال الداخلية ( الأرفف _ القوائم - التقفيلات الداخلية ) كلها قطاع واحد ولا يتغير من موديل للآخر ولا من شكل لآخر ( الميتاليك زى الألوان العادية زى الخشمونيوم زى الأكاسيا ) عشان فى ناس كتير بتعتقد أو بتسمع مثلا إن المطبخ الخشمونيوم قطاعاته أغلى من المطبخ العادى ( فرق اللون بيكون فقط فى الدهانات ).
ثانيا : المطابخ الألوميتال على غير المتعارف عليه ليها أشكال كتييير جدا غير الألوان العادية والخشمونيوم يعنى فى ألوان ميتايك وفى مطابخ اسمها اكاسيا وفى مطابخ UV ..... الأسعار هخليهاكو فى الآخر مع الصور
ثالثا : المطابخ الألوميتال الناس كانت بتقلق منها زمان عشان شكلها حدا وبارد .. دلوقتى بتطلع منها موديلات أجمل من الخشب .. ولو حد عاوز شكل الخشب .. الألوان الخشمونيوم بتطلع منظر الخشب أجمل بكتير من أى دهان للخشب نفسه ، خصوصا لو ركب شيت ألوميتال معاها ( هشرح الشيت فى نقطة الخشمونيوم ) .. والاكسسوار دلوقتى بيناسب الألوميتال أكتر من الخشب .
رابعا : الرخام ............ بينقسم نوعين
1- الطبيعى : وده اللى بيكون ألوان طبيعية جدا سواء درجات الجرانيت أو الرخام العادى
الجرانيت بيكون أفضل وأغلى لأنه مش بيتجرح ولمعته أعلى و صلابته أكتر من الرخام العادى .. بس فى رخام زى الأخضر الهندى واجلاكسى أفضل بكتير من الجرانيت وأصلب منه
2- الرخام الصناعى : وده بيكون متصنع ومصبوب على حسب رغبة العميل سواء تصميمه أو لونه أو حتى الديكور اللى فيه
اللى بيميز الرخام الصناعى انه مفيهوش لحامات تماما .. يعنى المطبخ بييجى قطعة واحدة حتى لو هو واخد اكتر من ركن والالوزر اللى فى الضهر بيكون مصبوب فى الرخامة .. وحتى حلة الحوض بتكون فى الرخامة كلهم قطعة واحدة .. فالمنظر بيكون أروع .. وكمان اللون اللى بتطلبه بيكون موجود أيا كان ......... فى رخام صناعى أمريكى واسبانى وصينى وكورى
العيب القاتل فيه انه غالى جدااااااااااااااااااااااااااااااااااا بيوصل ل 2200 جنيه للمتر ........ أغلى من معظم أسعار المطابخ
خامسا : قبل ما اشرح اشكال المطابخ بالصور عاوز اقول كذا حاجة لاحظيها وانتى بتعملى مطبخ
1- أفضل أنواع الألوميتال هو المصرى .. أى حد بيقولك دانا بشتغل ألوميتال سعودى واماراتى وصينى متتعامليش معاه ، لأن الخامات بتكون خفيفة جدا ممكن توصل ل 1/3 المصرى ( بتتحسب ان عود قطاع الدرفة فى الألوميتال المصرى بيكون 4 كيلو .. فى الألوميتال السعودى والاماراتى بيكون 1.5 كيلو .. والصينى مش بيكمل كيلو ) عشان كده متتخدعيش فى فرق الأسعار الرهيب بين واحد بيكون سعر المطبخ عنده 1500 والتانى بيكون 700
وانا قلت الألوميتال بس .. الاكسسوار حاجة تانية
2- متسمحيش لحد يرفع مقاسات غير فنى المطابخ أو المهندس اللى هينفذلك المطبخ .. حتى لومهندس فى فنيات فى المقاسات ميعرفهاش غير الفنى .. مثلا الشطرة بتاعة الزوايا لو حد أخدها غلط بتبوظ شكل المطبخ . ده تحذير هااام جدا.
3- المطابخ عموما بتكون سعرها شامل المقابض - ودى بتكون من اختيارك - والمفصلات - اوعى تسمحى ان حد يركبلك مفصلات صينى .. مهما كانت جودتها صلاحيتها لا تتعدى السنة .. صممى على المفصلات الايطالى أو التركى كأضعف الإيمان .. ولو حالتك المادية عالية اطلبى مفصلة نوعها " bloom " ألمانى بس غالية شوية .. بس أنضف مفصلة بلا منازع سعرها حوالى 35 جنيه ... فبترفع السعر جامد .. بس الغالى تمنه فيه .
4 - الاكسسوارات اللى بتركب جوه المطبخ .. دى حاجات كتير جدا وكتير منهم بيكون بلا فائدة وأسعارهم غالية ع الفاضى ..